هذه قصتي

مقدمة عن القصة
وهي بعنوان:هذه قصتي

‏_
‏_
كنت شابا وسيما مليئا بالحيوية والنشاط مثل أي شاب في عمري ولكن خطئي الوحيد هو عدم إستقامتي فكنت أقضي ليلي مع أصدقائي بالهو ونهاري في المدرسة ولا أخفي عليكم أنني أتهرب من المدرسة بسبب مللي منها..
إسمي هو عمر أحمد وعمري17عام وأسكن في إحدى أحياء مدينة الخرطوم وأنا الآن في الصف الثالث الثانوي..
أما أسرتي فتتكون من أبي وأمي وأخي الكبير.
وقد توفي أبي منذ زمن وترك أمي تعاني في تربيتنا وإسمها زينب.
وأخي الكبير إسمه علي وهو الآن يعمل بدل والدي الذي ترك لنا أموالا كثيرا فمنذ أن توفي أبي أصبح أخي هو الذي يدير الأعمال.
أما منزلنا فهو عباره عن ثلاثة طوابق.
‏~
‏~
‏~
هذا تمهيد بسيط للقصة أتمنى أن يعجبكم ‎ وسنخوض في تفاصيلها إن شاء الله في سلسله من الحلقات‎ ‎
عفوا القصة مكتوبة بالدارجي(السودان)‎   ‎
الحلقات ستكون في الردود بالترتيب ‎ ‎ ‎

الحلقة الاولى
‏_
في المدرسة
صباحا عند الساعة 8:40ص
[بداية العام الدراسي وعمر في الصف الثالث ثانوي]

طبعا عمر متعود إمشي المدرسة متأخر وطبعا دخل المدرسة وأخد سوطين من أستاذ آدم بتاع مادة الرياضيات
أستاذ آدم بتكلم مع عمر:"عاوزك نهاية اليوم تجي لي في المكتب فاهم"
‏"أففف حاضر"عمر يرد بضيق شديد
بدأ عمر يمشي نحو فصله وهو يتلفت حوله عساه يجد شيئا قد تغير في المدرسة ولكن لا شيئ تغير
عمر يحدث نفسه"رجعنا للعذاب تاني،أسي الزول أكان مشى نام ما أكان أخير من وجع الراس ده"
‏~
وصل ودخل الفصل ولقه الحصه شغاله ونال بعض التوبيخ من الأستاذ
‏~
مرت الحصة الأولى والثانيةوالثالثه وأخيرا دق جرس الفطور
عمر بعد ما فطر قاعد هو وأصحابوا وراء الفصل..
عمر:"أها ياجماعة شوفوا لينا طريقه لباقي اليوم ده"
مصعب:"شنو ياعمر من بداية السنة زهجان"
عمر:"بداية السنة ونهاية السنة واحد عندي"
بكري:"أصبر شوية ياعمر ماطوالي كده"
ماجد:"ياجماعة إنتو نسيتو أنكم في تالته"
عمر:"ويعني أكان في تالته"
ماجد:"يعني ما بتهمك الشهادة"
عمر بسخرية:"شهاده هههه"
بكري:"نحن يادوب في بداية السنة ياماجد"
ماجد:"خلاص أنتو ذاكروا نهاية السنة عشان تتخارجوا بأي نسبه لكن أنا عاوز نسبه عاليه"
مصعب:"ههههه ده منو البتكلم ده ماجد أصلو مابصدق"
عمر:"الظاهر إنو في زول أداه محاضره"
وبدأ عمر ومصعب يضحكان
وبكري ماقدر إضحك
ماجد زعل شديد وقبل ما إمشي قال:"أنا أصلا قلطان البتكلم معاكم"
ومشى منهم زعلان
بكري:"عمر،مصعب خلاص كفاية ضحك"
عمر:"ههههه ماجد الكان بتلب قبلينا لمن نشرد من آخر حصه أسي ههههه"
مصعب:"ههههه وبقول نسبه عالية ههههه"
بكري بدأ يضايق منهم وقرب إمشي إخليهم لكن شاف خالد جاي من بعيد
خالد وصل ليهم ومستغرب من ضحك عمر ومصعب وبدأ يسأل:"ضحكون معاكم ياشباب"
بكري:"خليهم ديل بضحكوا على ماجد"
خالد:"ماجد،مالوا عمل شنو ضحكم كده"
وقام بكري حكى لي خالد الحصل كلوا
خالد:"عمر،مصعب"
عمر ومصعب بحاولوا أوقفوا الضحك
عمر:"وين كنت ماجيت فطرت معانا"
خالد:"أنهيت موضوع بسيط"
مصعب:"سر يعني مادايرنا نعرف"
خالد:"بعدين بعد ما نطلع من المدرسه بكلمكم"
مصعب:"ظابط"
عمر:"أه ما قلتوا لي نشتت ولا كيف"
خالد:"طبعا نحن فاضين عشان نحضر لقاية الحصة الثامنة"
مصعب:"آخر حصة شنو هي"
بكري:"رياضيات مع إستاذ آدم"
عمر فجأة إتذكر إنو أستاذ آدم قال ليهو تجي لي بعد نهاية اليوم..

يتبع...

هذه قصتي الحلقة الثانية:
‏_
الجرس ضرب وإنتهت فسحة الفطور ورجعوا الفصل وهم ناوين مايحضروا آخر حصتين..
لكن عمر كان بفكر في حل لإستاذ آدم..
عمر مقعدو آخر الفصل وجنبو مصعب وخالد لكن بكري قاعد في نص الفصل وأما ماجد قاعد قدام في الصف الثاني..
وقبل ما الحصة تبدأ..
مصعب بتكلم مع عمر
مصعب:"مالك ياعمر ساكت ساي"
عمر:"بفكر لي في حل لإستاذ آدم ده"
مصعب:"كيف"
عمر:"الصباح بعد ما جلدني قال لي عاوزك تجي لي نهاية اليوم"
مصعب:"وعاوز تمشي ليو"
عمر:"المشكله في أمشي ليو"
مصعب:"يعني عاوز تحضر الحصص وتمشي ليو"
عمر:"ياخي أحضر شنو ،أنا أكان علي عاوز أفرتك من أسي"
مصعب:"طيب والحل شنو"
عمر:"ما عارف لحدي أسي أعمل شنو"
مصعب:"مشكله دي"
عمر:"إنت خالد ده نايم"
مصعب:"إنت ما عارف خالد بعد الفطور بنوم طوالي"
عمر:"صحي عشان يشوف لي حل للمشكله د..." قطع كلامو دخول الإستاذ...
.
"السلام عليكم"
الأستاذ
"وعليكم السلام ورحمة الله وبركاته"
الطلبه
~
~
إنتهت الحصة الرابعه والخامسة والسادسه وجرس فسحة صلاة الظهر ضرب..
الأولاد كلهم طلعوا من الفصل عشان إمشوا إصلوا إلا عمر ومصعب وخالد قاعدين في الفصل..
.
خالد بتكلم مع عمر: "وإنت خايف من أستاذ آدم ما طوالي بتنجلد عادي"
عمر:"يعني أطنش منو"
خالد:"وإنت داير تمشي ليو يعني"
عمر:"المشكله إنو بعرف أخوي علي وخايف إكلموا"
مصعب:"خلاص إنت أقعد وأحضر الحصة الآخيرة ونحن ماشين"
خالد:"أها ماشي معانة وله تقعد"
عمر:"شنو ياجماعة الحقارة دي"
مصعب:"ما إنت شابكنه أستاذ آدم وأخوي علي"
عمر:"أقول ليكم كلام أنا أعمل نايم وخلي أستاذ آدم إسوي الدايرو"
خالد:"جميل،يلا"
~
~
بعد ما طلعوا من المدرسة وماشين في الشارع..
مصعب:"أها ياخالد قبيل قلته ماجيت فطرت معانة مالك"
خالد إطلع كيس من جيبوا:"عشان الكيس ده"
عمر:"فيهوا شنو الكيس ده"
خالد فتح الكيس وطلع منو حبوب..
عمر:"حبوب شنو دي"
خالد:"جرب وبتعرف براك"
مصعب:"مخدرات مش كده"
عمر:"أكان مخدرات شكرا ليك ماعاوز وخليني مع السجاير بس"
خالد:"وإنت برضوا يامصعب ماداير"
مصعب:"أي حاجة إلا المخدرات"
.
وقضوا بقية اليوم إتسكعوا من شارع لشارع وجنب مدرسة البنات..
لمن الساعة5:00م جات وأي واحد منهم مش لي أهلوا..
.
طبعا في المدرسة أستاذ آدم لاحظ غياب عمر..
وأما بكري ماصدق إنهم مشو عشان هو أصلا ماداير يشرد زيهم تاني..
____
يتبع...

هذه قصتي-الحلقة الثالثة
_
وهو راجع على البيت بعد ما ودع مصعب وخالد وكمان إتفقوا إنهم إتقابلو بالليل جنب دكان حسن الجنب الزلط
عمر أكان ماشي في الشارع علي راحتوا وماسك الشنطة بكل إستهتار لمن وصل البيت
والبيت بعد شارعين بس من الزلط ومابعيد من مدرسة عمر شديد
عمر واقف جنب الباب بعد ما ضرب الجرس
وأخيرا الشغالة فتحت الباب
عمر بصراخ:"سنة عشان تفتحي الباب"
الشغالة:"معليش ياولدي كنت مع المطبخ"
عمر ما إشتغل بيها كتير ودخل طوالي
الشغالة إسمه فاطمة عمرها35سنة وهي بتشتغل عندهم ليه زمن طويل وهي طيبه وعارفه تصرفات عمر كيف عشان كده بتستحملوا
.
الحاجة زينب أم عمر كانت قاعدة في الصالة لمن عمر دخل
زينب:"حمدلله على السلام مالك إتأخرت كده ياولدي"
عمر:"أكان عندنا حصه إضافية ياأمي"
زينب:"أجي من أول يوم حصه إضافية"
عمر:"تقولي شنو ياأمي ديل عاوزين إقتلونا من أسي،عشان السنة دي أهم سنة"
زينب:"أسي تلقاك جيت تعبان وجعان،أمشي غير هدومك وصلي العصر عشان نتغده سوى"
عمر:"حاااضر هوى بس"
ومشى طوالي لي غرفتوا
الحاجة زينب بتعاين ليو لمن مشى:"الله إنجحك ياولدي"
~
عمر دخل إستحمى وغير ملابسوا ونسى أو إتناسى صلاة العصر
ومشى عشان إتغده
بعد ما فاطمة جابت الأكل قدام حاجة زينب وعمر
زينب:"أقعدي عشان تاكلي معانة"
فاطمة:"ما بقدر يادوبك ألحق أوصل البيت"
زينب:"يعني ماشه أسي ماقلتي بعد المغرب لمن علي إوصل"
فاطمة:"معليش الأولاد زمنهم منتظرين"
زينب:"خلاص،الله إديك العافية مع السلامة"
.
خلصوا اكل وعمر شال الصينية ودخله المطبخ
زينب:"ياعمر.."
عمر:"نعم ياأمي"
زينب:"تعال أقعد عاوزه أتكلم معاك"
عمر قعد في الكرسي
زينب:"إنت أمبارح إتشاكلته مع منو"
عمر مستغرب:"الكلمك منو؟"
زينب:"سيبك من الكلمني ورد على سؤالي"
عمر:"إتشاكلته مع ياسر"
زينب:"ياولدي أنا ما قلته ليك ما تتعامل مع الولد ده تاني"
عمر:"وأنا ما سألتوا أصلا هو البدء إتكلم معاي وينبذ فيني"
زينب:"وإنت تقوم تضربوا لمن تجرحوا في راسوا"
عمر:"خلاص أنا الغلطان"
زينب:"ياولدي الله إهديك أبعد من المشاكل"
عمر:"حاضر..."
~
العصرية إنتهت ودخل وقت المغرب
حاجة زينب بتنادي في عمر القاعد جوه في غرفتوا:"ياعمر تعال أفتح الباب لي أخوك"
وما رد عليها وإضطرت إنها تمشي تفتحوا بنفسها
وصلت للباب وفتحتوا
.
"السلام عليكم ياحاجة"
"وعليكم السلام"حاجة زينب بترد على الواقف قدام الباب..
يتبع...

هذه قصتي-الحلقة الرابعة
_
"السلام عليكم ياحاجة"
"وعليكم السلام"
حاجة زينب بترد على الواقف قدام الباب وماعرفتو ده منو..
"كيف صحتك ياحاجة زينب"
زينب:"الحمدلله"
"أنا أستاذ آدم ياحاجة نسيتيني"
زينب:"كيفك ياولدي إتفضل على البيت"
أستاذ آدم:"معليش بس كنت عاوز عمر"
زينب بإستغراب:"في شنو ياولدي"
أستاذ آدم:"لا بس كنت داير أكلمو في موضوع بسيط،هو موجود"
زينب:"آي موجود، إتفضل"
أستاذ آدم:"معليش مستعجل عشان الأذان بس خليهو إقابلني بعد الصلاة في الجامع القريب ده"
زينب:"خلاص بكلمو ليك"
وتقفل الباب وتدخل..
"يا عمر"حاجة زينب بتنادي
وبرضو مافي رد
ومشت طوالي لي غرفتو وفتحت الباب
عمر أكان نايم..
زينب بتصحي فيهو
"المغرب أذن قوم ياولد"
عمر ماداير إصحى..
زينب:"أستاذ آدم جاك وعاوزك تقابلو بعد الصلاة"
وفجأة عمر فتح عيونو وقام بي سرعة
زينب:"بسم الله الرحمن الرحيم مالك ياولد نطيت كده"
عمر:"م مافي حاجة"
زينب:"طيب قوم عشان تلحق الصلاة"ثم خرجت فورا وخلت عمر لسه قاعد في السرير
أسي أنا أعمل شنو أكان مامشيت ليهو المره دي مابعيد إكلم أمي وأخوي
أحسن لي أمشي ليو
_
إنتهت صلاة المغرب والناس طالعين من الجامع
المهم بعد مسافة كده أستاذ آدم طلع من الجامع وشاف عمر مستنيهو جنب الباب
"السلام عليكم،كيفك ياعمر"
عمر متوتر شوية:"كويس"
أستاذ آدم:"أرح عشان ماتتأخر على والدتك"
عمر بإستغراب:"وين ماشين"
أستاذ آدم ما رد عليه عشان إنهم أصلا ما حاإمشو فجه بعيده بس لحدي لفة الشارع الثاتي
أستاذ آدم فتح باب العربية بتعتو وعمر بي توترو ركب العربية جنب كرسي السواق القاعد فيه أستاذ آدم..
آدم:"إنت عارف أنا عاوزك في شنو"
عمر:"عشان ماجيتك قبيل"
آدم:"طيب ليه ماجيت"
عمر يسكت ولم يرد
آدم:"أنا عاوز مصلحتك"
عمر:"وأنا عارف مصلحتي وين"
آدم:"طيب قاعد تتهرب من المدرسة مالك"
عمر:"زهج"
آدم:"ده ماسبب مقنع ياعمر،دي آخر سنة ومنها والجامعه"
عمر:"ماعاوز أخش الجامعه أصلا"
آدم يضع يده في وجهه :"إنت عاوز تجيب لي وجع راس وخلاص"
عمر:"وإنت تاعب روحك معاي ليه خليني"
آدم ينظر له ثم يرجع ظهره على المقعد وعقله يتذكر أحداث كثيره وأخيرا ينطق ببعض الكلمات:"السبب هو أبوك"
عمر بإستغراب:"أبوي! كيف هو السبب"
آدم:"لأنو أبوك الله يرحمه ساعدني لمن أكانت أمي محتاجه لعملية فقام إتكفل بقروش العملية،وساعدني في حاجات كثيرة ما بقدر أسده، عرفته سبب إهتمامي بيك"
‏_
يتبع...

هذه قصتي-الحلقة{5}
_
آدم(عرفته سبب إهتمامي بيك)
عمر لم يرد بشيئ
آدم(أتمنى إنك تحاول تتصلح)
عمر بإستنكار(أتصلح لي شنو فيني حاجة خطأ)
آدم(خطأ!دي كمية أخطاء ومافي داعي أذكرن)
عمر بضيق(المهم انا بهتم بروحي)
آدم(طيب أمشي عشان أمك قاعده براها)
عمر فتح باب العربية وخرج ووقف ينظر لأستاذ آدم بدور في العربية..
أستاذ آدم مشى وخله عمر واقف:
الأستاذ ده مالو معاي عاوز إقيف لي شوكه
هههههه(أبوك ساعدني) ههه وأنا ذنبي شنو تقيف لي زي شرطي المرور
_
في البيت..
علي أخو عمر وقف عربتو بره ونزل يفتح باب البيت
بعد مادخل العربية الوالدة زينب طالعه من الصاله
زينب(الحمد لله على السلام)
علي عمرو 23سنه(الله يسلمك ياأمي)
زينب(إتأخرته شديد)
علي يبوس راس أمو
(معليش الشغل جره شوية)
زينب(الله إديك العافية ياولدي)
دخلوا الصاله
زينب(قوم غير هدومك مسافة أخت ليك الأكل)
علي(حاضر)
وهو ماشي على الباب
(عمر وين ماشايفو)
زينب(عمر لسه ما جه من الصلاة)
علي عاين لي ساعتو(اسي الساعة سبع وتلت)
وفجأه يسمعو صوت جرس الباب..
زينب(أهو ده جه)
علي عاوز يمشي يفتح الباب لكن زينب قالت ليهو(خليك أنا بمشي بفتحو..إنت أمشي غير هدومك)
علي(سمح)
~
~
علي وعمر وزينب قاعدين في الصاله إتفرجو على التلفزيون..
علي(كيف المدرسة معاك ياعمر)
عمر(تمام)
علي(دي سنة تالته يعني منها والجامعه)
عمر وهو بعاين في التلفزيون(آي،يله خلينة النتابع المسلسل دي)
علي يعاين لي عمر وحاجة زينب
علي يبتسم(حتى إنتي ياحاجة سرحانه في المسلسل)
زينب(آي ياولدي إتكلمته معاي)
علي(هههه خلاص خليكي بعد ماتنتهي مسلسلكم دي)
عمر(يا علي ماتسكت وتخلينة نسمع زي الناس)
علي في نفسه..
بتين المسلسل دي تنتهي..انا ماعارف عمر وأمي متابعنه كيف..يله نصبر فضل ربع ساعة بس..
وبقه يعاين لي الساعة
7:45 م
.
.
عمر يتمطه(بكره أكييد الحلقة الآخيرة)
زينب(وينو علي)
علي يدخل الصاله..
(نعم ياست الكل)
عمر(يله تعال أنضم ساي)
علي(ههههه)
~
وبعد ربع ساعه يعني 8:15م أذان العشاء أذن
زينب(الله أكبر)
علي(أها أنا أقوم أمشي الصلاة)
عمر(ده يادوب أذن إنت مستعجل ليه)
زينب(أسي بقيموها قوم ساي)
علي(بطل كسل وقوم)
عمر(اففف خلاص قايم)
~
~
-..السلام عليكم ورحمة الله-
عمر طلع طوالي..
وعلي أخد ليهو قعده بعد الصلاة
عمر بعد ماطلع مشى إقابل مصعب وخالد جنب دكان حسن زي ماإتفقوا..
_
يتبع...

هذه قصتي-الحلقة{6}
عمر قطع الزلط ودخل دكان حسن..
عمر:"حسونه"
حسن شاب في العشرينات:"أووو عمر كيف حالك"
عمر:"تمام والله"
حسن:"إتفضل أقعد أسي بجيك"
عمر يقعد في صندوق بره الدكان..
وبعد ماحسن بايع الزباين العندو مرق لي عمر..
حسن:"وين يافردة مختفي"
عمر:"زهج ساي"
حسن:"زهج وله خايف من ياسر"
عمر:"أنا أخاف من العوير ده"
حسن:"طيب أمبارح ليه ماجيت"
عمر:"ماقدرته أجي بس"
وبعد شوية خالد ومصعب وصلو..
مصعب وخالد يسلمو علي حسن
عمر:"شنو ياجماعة التأخير ده"
مصعب:"أسأل خالد مشى وين وخلاني أستناهو ربع ساعة"
عمر عاين لي خالد
خالد يحاول يغير الموضوع عشان حسن معاهم:"ربع ساعه!دي كلها خمس دقائق"
مصعب:"شنو!إنت جادي ده أنا كرعيني إتكسرن وتقول خمسه د.."
خالد قرصوا عشان يسكت وبقه يحمر ليهو
وفجأة جه زبون وحسن دخل يبايعو..
خالد:"إنت غبي"
مصعب:"وأنا أعرف كيف إنك ماعاوز تتكلم قدام حسن"
عمر قاعد يضحك "ههههههه"
خالد:"أها عاين للمجنون التاني ده"
مصعب:"يعني عاوز تقول أنا الأول"
خالد:"إنتو حاتقضوها أنا الأول وده التاني"
مصعب:"ما إنت البديت الكلام ده"
خالد:"نمشي النادي وله وين"
عمر يهدأ:"النادي فيهو شنو الليله"
مصعب:"مافي أي كوره الليله ولا مصارعة"
خالد:"في فلم ظابط"
عمر:"أوعاك تقول هندي"
مصعب:"أكيد أصلو خالد جنو أفلام هندية"
حسن طلع من الدكان..
حسن:"ماله ماسمحه"
خالد:"أنساهم ديل مابعرفو حاجة"
عمر:"يازول أمشي إتفرج علي العواره دي براك"
خالد:"أها تقترحو شنو"
مصعب:"نمشي شارع النيل"
خالد:"ياخي شارع النيل شنو،ده أسي تلقاهو فاضي"
حسن:"فاضي شنو يازول ده تلقاهو مليان عجائب"
عمر:"ههههه عجائب ساي"
خالد:"أرحكم طيب"
مصعب وعمر وخالد :"سلام ياحسن"
حسن:"سلام"
وهم ماشين..
مصعب:"خالد ماقلته لي مشيت وين وخليتني مستنيك"
خالد:"مشيت أشتري خرشه"
مصعب:"يعني ماعاوز تبطل الزفت ده"
خالد:"إنت أكان شايفو زفت أنا شايفو ميه الميه"
مصعب:"شنو ياعمر ماتتكلم تقول حاجة"
عمر:"طالما خالد عاوز الشي ده أنا الدخلني شنو"
خالد:"إنت كده"
مصعب:"أنا زاتي غلطان السألتك"
_
في مكان آخر داخل الحله..
:"حاتعمل مع عمر شنو يا ياسر"
ياسر شاب عمرو 19سنة وأسي هو في تانية جامعه يعني أكبر من عمر بي سنتين
"ماعندك لي إقتراح يا إبراهيم"
إبراهيم قدر ياسر وبرضو بقره في الجامعة مع ياسر :"الزول ده لازم نديهو درس ما إنساه نهائي"
ياسر يلمس راسو الملفوف بي شاش:"لازم"
إبراهيم:"رايك شنو نشرك ليهو بكره بعد ما إطلع من المدرسة"
ياسر يفكر كده:"ههههه إنت قديم خلاص لكن ماشي نستناهو"
إبراهيم:"عندك راي تاني"
ياسر:"بعد ما أتأكد حاأكلمك بيهو"
إبراهيم مستغرب:"تتأكد من شنو"
_
يتبع...

هذه قصتي الحلقة{7}
إبراهيم مستغرب:"تتأكد من شنو"
ياسر:"يازول ماقلته ليك بعد ماأتأكد"
إبراهيم:"بي راحتك"
ياسر:"يعني بكره نجلي الجامعه ونمشي نشرك ليهو"
إبراهيم:"طبعا"
ياسر:"جميل"
إبراهيم:"لكن أنا مستغرب فيك إنك ،لي شنو مشيت شتمتو كده"
ياسر:"ما تهتم كتير"
إبراهيم:"طيب لي شنو خليتو إضربك في راسك"
ياسر يضايق:"الزول شال الطوبه وفناني بيها"
إبراهيم:"ماكنت تردها ليهو طوالي لي شنو خليتوا يمشي ساي"
ياسر خلاص زهج من أسئلة إبراهيم..
ياسر بغضب:"الناس حجزونا ومالقيت طريقه أها عندك راي"
إبراهيم:"أكان كنت معاك ماكنت خليتو"
ياسر:"ابراااهيييم خلاص قفل"
إبراهيم:"خلاص سكته أها ماتكورك"
_
في بيت ناس عمر..
علي رجع من المسجد..
فتح الباب بي المفتاح ودخل..
حاجة زينب أكانت قاعدة جوه الصاله..
علي:"السلام عليكم"
زينب:"وعليكم السلام"
علي يقعد في الكنبه:"آآآه"
زينب:"أمشي إرتاح ياولدي إنت شغال اليوم كلو"
علي يبتسم:"وأخلي ست الناس براها دي بتجي"
زينب:"انا النهار كلو نايمة الباقي عليك"
علي:"أنا مانعسان أسي"
زينب:"الله إديك العافية ياولدي وإديك الفي مراضك"
علي يبتسم..
زينب:"إنت عمر رسلتو وله شنو"
علي:"مارسلتو.. في شنو‎"‎
زينب:"أصلو لسه مارجع من مامشى المسجد"
علي:"بكون مشى وين الولد ده"
زينب:"أضرب ليهو لأنو شال التلفون معاهو"
علي يطلع تلفونو..
.
-جاري الإتصال..أخي-
عمر-ألو
علي-إنت مشيت وين
عمر-أ..أنا مع حسن في الدكان
علي-أها وحاتجي بتين
عمر-إمكن أتأخر شوية
علي-قلته إنك في دكان حسن
عمر-آآي ليه في شنو
علي-لا لكن أنا سامع جوطه شديده
عمر-أسكتو يازفاتين..أها قلته لي شنو ياعلي
علي-خلاص بس الساعة عشرة تكون في البيت فاهم
عمر-عشرة! أففف خلاص
.جاري قطع الإتصال..
.
زينب:"قال وين"
علي:"في دكان حسن"
زينب:"خليهو تلقاهو مع أصحابو"
علي قام من الكنبه ومشى قعد جنب أمو في الكنبه المقاصدة التلفزيون ومسك الريمود..
علي:"في برنامج سمح بجيبوهو في النيل الأزرق"
زينب:"كدي جيبو النشوفو"
_
في شارع النيل..
خالد:"أها ماقلت ليكم فاضي"
مصعب:"إنت ماشايف الناس دي كلها"
عمر:"ههههه صحبك عاوز النوعيه التانية من الناس"
مصعب:"ههههه"
خالد:"أوووو"
عمر:"مالك يازول"
مصعب:"كشف هناك ياغبي"
عمر يعاين:"خلوها لي دي ياجماعة"
خالد:"إخلوها ليك! إنت مجنون وله شنو"
مصعب:"بنوته جديده لنج"
عمر:"رايكم شنو نعمل قرعه"
مصعب:"أنا موافق"
وفجأة عمر ومصعب يلتفتو حوليهم وما لقو خالد..
وطواالي يعاينو مكان البت يلقو ليك خالد ماشي ليها..
عمر:"شوف المعفن ده"
مصعب يضغط علي أضراسه:"معفن ساي"
_
يتبع...

هذه قصتي-الحلقة{8}
عمر رجع البيت الساعة 11:00م
بعد مافتحو ليهو الباب وخشو الصاله..
علي بغضب:"أنا ما قلت ليك الساعة عشره تكون في البيت"
عمر:"ما ما واحد من أصحابنه عزمنه عشى وماقدرته أمشي أخليهم"
زينب:"خلاص ياعلي"
عمر:"وهي الساعة يادوب 11:00"
علي أكان عاوز أكورك فيهو لكن حاجة زينب سبقتو:"إنتهينا ياعمر خلاص أسكت"
وطوالي عمر مشى لي غرفتو
علي قعد في الكنبه..
زينب:"مافيها حاجة ياعلي إنو إجي الساعة 11:00طالما قاعد مع أصحابو"
علي:"الليله الساعة11:00وبكره 12:00وبعدو لي الصباح"
زينب:"ماتخاف أنا حاأتكلم معاهو بكره.. أسي إنت قوم نوم"
علي:"لا أنا قاعد شوية"
زينب:"طيب أنا قايمه أنوم"وخرجت من الصاله..
أخرج نفسا عميقا بعد ذهاب الحاجة زينب
.
<تن تتن تن تن>صوت التلفون
دخل يدو في جيبو وطلع التلفون..
-منذر يتصل بك-
علي-وعليكم السلام
منذر-كيف وصلته
علي-ههههه تضرب لي الساعة11:00وتقول لي وصلته كيف
منذر-ههههه آسفين على التأخير يامدير بس كنت مشغول شوية
علي-آي ماإنت عريس لازم تنشغل
منذر-هههه عريس دي لسه بدري نحن يادوب خاطبين
علي-أها خير أصلا إنت مابتضرب ساي
منذر-ههههه طبعا لازم إكون في موضوع عشان أضرب يعني دايرني أضيع رصيدي ساي
علي-هههههه خلاص أسي إختصر وقول الدايرو
منذر-أسي إبدو من وين
علي-إنت لسه داير تبدأ
منذر-أصبر خليني أتكلم
علي-أها
منذر-طبعا إنت بتعرف خطيبتي سلوى
علي-أها
منذر-وأنا عشان بحبك.. وبعد سلوى إقترحت لي فكرة جميله جدا واتمنى إنك تقبل بيها
علي-قول وأنا أشوف
منذر-رايك شنو إنك تلحقني ونعرس سوى
علي-ههههه تصدق دي فكرة سمحة
منذر-أنا بتكلم جادي ياعلي
علي-طيب أنا موافق
منذر-جد
علي-لا
منذر-علي بطل هزار
علي-خلاص موافق لكن في مشكله
منذر-وانا عندي الحل
علي-وإنت أصلا عرفته المشكله شنو
منذر-أنا عارفك ماخاتي أي وحده في راسك ودي مشكلتك مش كده
علي-ههههه أها دي حلها كيف
منذر-ياخي بنات الحلال كتار وتاني حاجة انا أكان ماعندي ليك وحده بقترح ليك فكره زي دي
علي-منذر أنا عارفك ومجربك قبل كده
منذر-هههه لا المره دي سلوى العزلته
علي-طيب،هي منو
منذر-ماتستعجل حاتعرف كل حاجة
علي-خلاص بكره بعد الشغل نقعد ونتكلم
منذر-الرصيد صفر،مع السلامة
علي-ههههههه
منذر-تضحك،أصبر أكان ماخليتك تدفع حق الرصيد ده كلو
-تييت تييت تييت جاري قطع الإتصال
_
في غرفة عمر..
طبعا بتكلم بالتلفون مع وحده زي كل يوم..
_
يتبع...

هذه قصتي-الحلقة{9}
_
في مكان ما،عندما حل الصباح
سعد(يازول براحه ماتكتر منها بالطريقه دي)
خالد(إنت مالك،مش بديك قروشك طوال)
سعد(أها داير حبوب برضو الليله)
خالد(أي حاجة وخلصنة)
سعد(هههه أنصحك تخفف شوية عشان ما كل يوم تجيني لمن تخلص قروشك وتقعد تحنس فيني)
خالد بغضب(يازفت قلت ليك أديني أسي وأجل نصايحك دي)
سعد(خد وقطع وشك من هنه)
خالد شال الكيس بي سرعه وطلع حبه وبلعها
.
[سعد شاب عمره 20سنة..وهو كما عرفتو ببيع في المخدرات..وهو أيضا يقرأ في الجامعه في المستوى الثالث]
_
وفي مكان قريب من سعد وخالد
ياسر وإبراهيم مترصدين لعمر جنب المدرسه
ياسر(هههه عاين ليهو بضحك كيف)
إبراهيم(نشوف بعد المدرسه حاإضحك تاني)
ياسر(هاهاها)
_
عند سعد وخالد..
سعد(إرتحته خلاص)
خالد(ياسلام)
سعد(يله أنكت)
خالد(أنكت شنو)
سعد(الكاش موني)
خالد(آآآ فهمتك هههه)
سعد(مخك ضرب بي السرعه دي)
خالد(هاك وريحني)
ومد ليهو قروش
سعد إستلم القروش وحسبن ومشى طوالي
_
عند ياسر وإبراهيم..
إبراهيم(ياسر مانمشي ونجيهو نهاية اليوم حانقعد اليوم كلو هنا)
ياسر(لا خلينة قاعدين أصلا هو بعض مرات بشرد)
وفجأة سعد مره بي عندهم
إبراهيم(ياسر شوف داك منو)
ياسر(هههه سعد الجابو هنا شنو)
إبراهيم(ياا سعد)
سعد ينتبه ليهم
سعد(ابراهوما وياسور)
إبراهيم(هههه إنت ماحاتخلي جنونك ده)
ياسر(سعدون كيف حالك)
سعد(تمام الحمدلله وإنتو كيف)
إبراهيم(طيبين)
ياسر(الجابك هنا شنو الليله)
سعد(هههه جيت للفهم داك)
ياسر(هههه جد،يعني إنت ماخليت الشغلانية دي)
سعد(يازول أخليها كيف وهي بتمله الجيب)
إبراهيم مستغرب وقاعد يعاين ليهم(دقيقه ياجماعه ماتفهمونة معاكم)
سعد(إنت ماعارف ياإبراهيم)
ياسر(حاأكلمك بعدين ياإبراهيم)
إبراهيم(بعدين هو أي حاجة بعدين)
سعد(هههه خلاص..أنا حاأقول ليك..الفهم ده تجارة مخدرات من النوع الجامد)
إبراهيم بي دهشه(ههه مخدرات)
ياسر(أها ياسعد الظاهر عندك زبون هنا)
سعد(آي)
ياسر(جميل)
سعد(أها ياجماعه بعد إذنكم أنا ماشي)
ياسر(أسمع أنا عاوز رقم تلفونك عندي موضوع عشانك)
سعد من بعيد(شيلو من إبراهيم"
ياسر:"ده الراي الكلمتك بيهو"
إبراهيم:"برضو مافهمت حاجة"
ياسر:"بعدين بتفهم"
إبراهيم:"بعدييين تاني"
_
ساعات الصباح ممله بالنسبه لعمر ومصعب وهم داخل المدرسه أو مايسموه بالسجن..
عمر:"أففف حالتو يادوب الحصة الاولى خلصت"
مصعب:"وكمان الزايد الحكاية ملل إنو المعفن خالد مسجل غياب"
عمر:"بس خلينا نطلع ونلاقيهو الخاين ده،إغيب من دون ماإدينه خبر"
_
يتبع...

هذه قصتي-الحلقة{10}
-
الساعة1:00م وقت الفسحة
عمر(هههه صحبك ماجد فارقنة)
مصعب(هههه عامل فيها بقه شاطر)
عمر(خليهو شوية وحا إرجع تاني)
مصعب(وبكري برضو لحقو)
عمر(سيبك من المملين ديل وجيب سجارة)
مصعب(بعد مانطلع من المدرسه)
وبعد شوية خالد ينط من الحيطه
عمر(اووو شوف المعفن جه)
خالد(كيفكم شباب)
عمر(ما تمام)
مصعب(الجابك أسي شنو ماكنت تتمها)
خالد ما رد
عمر بإستهبال(جه يحضر حصة التاريخ مش كده ياخالد)
خالد أداهو نظره حارة
مصعب(هههه ده تلب الحيطه ودايرو يحضر حصة كمان)
عمر(ههههه)
خالد بضيق(خلاص خلصتو)
مصعب(مالك الليله زهجان كده)
خالد(عشان جيت أكلمكم بي حاجة وإنتو شبكتوها هزار)
عمر(اها خير)
خالد(ياسر وصحبو قاعدين جنب المدرسة والظاهر مستننك)
عمر(ههه ياسر)
مصعب(أكيد عاوز مشاكل)
خالد(أنا جيت أكلمك وماشي طوالي،يلا سلام)
وتحرك ناحية الحيطه
عمر(خالد مانحن برضو ماشين إستنه شوية)
خالد(لا،أنا فتران شوية حاأمشي البيت طوالي)
.
مصعب(الليله خالد ده مانصيح)
عمر:...
مصعب(بتفكر في ياسر مش)
عمر(هاهاها رايك شنو ننادي ناس معانه ونقلب الطاوله عليهو)
مصعب(اممم ظابط)
.
__
وبعد مرور ساعة أي الساعة2:00م
ياسر(أرح ندخل ونشوفو قاعد وله مرق)
إبراهيم(لكن ممكن يط..)
إنتبهو لي عمر الجاي عليهم لوحده
ياسر قام..
إبراهيم(أكان إحتجت للمساعدة ناديني)
ياسر يبتسم(ههه لا شكرا)
.
عمر يقف أمامهما(اووو ياسر كيف)
ياسر(هههه ياسر حا إكسر راس)
عمر(زي ما كسرتو ليك وله شنو)
وفجأة يظهر مصعب ومعاهو شلت أولاد..
إبراهيم(ياسر)
ياسر(أكان إنت داير تمشي أمشي)
عمر(أعرفك بيهم يا ياسر هههه)
مصعب(لا مافي داعي ياعمر حاإعرفنا أسي)
ياسر يتقدم ناحية عمر ويقوم يضربو في وجهه
.
عمر قرب إقع من الضربه ومسك خدو بألم
وطوالي هنا مصعب والمعاهو يتحركو علي ياسر
وبدأت الشكله وإنضم ليهم إبراهيم
[ناس الشارع إتلمو ،منهم القاعد إتفرج والبحجز غايتو ربنا يستر]
___
بعد الشكله ياسر وإبراهيم رجعوا
ياسر الضربه الفي راسي زادت وكمان إنضرب في عينو وأخد شلاليت كتيره وبرضو إبراهيم إستلم زيو كتير المهم إتهانو ورجعو
.
ياسر بغضب وغيظ وحقد(والله ما أخلي الكلب ده يا أنا يا هو)
إبراهيم(وأنا أقول شنو طيب،لكن هم أكانو عشره)
ياسر(إبراهيم أديني رقم سعد)
__
يتبع...

هذه قصتي-الحلقة{11}
ياسر ضرب لي سعد وإتفقو إنو إتقابلو بكره بعد الجامعه
أها المهم اليوم مره وجات المواعيد
داخل الكافتريا
إبراهيم(أهو سعد جاي)
سعد يقعد جنب ياسر وإبراهيم
سعد(خير في شنو ياجماعة مالك يا ياسر معوق كده)
ياسر قصة ليهو الحكاية كلها
سعد(امم أنا مابعرف عمر شديد لكن خالد بعرفو ده زبون)
ياسر(عشان كده أنا داير منك خدمه وحقك محفوظ)
سعد(طوالي بس فهمني أعمل شنو)
ياسر(شوف خالد بقه مدمن يعني بعمل آي حاجة عشان شمه واحده)
إبراهيم(وأنا مشيت سألته عنو لقيت مستواهم عادي يعني ح إفلس قريب)
ياسر(ولمن إفلس طبعا ح إجيك وإحنسك عشان تديهو وح إعمل آي حاجه وهنا إجي دورك)
سعد(آآ ياإبن اللذين،وبعد كده أنا ح أقوم أضغط عليهو عشان إوقع عمر في المخدرات)
ياسر يبتسم(آيو وتبقه دي أول ضربه)
إبراهيم(وإنت بعد ده خليت فيهو حاجة)
سعد(لكن خالد إلا أديهو عشان إنفذ الكلام ده وكده أنا ح أخسر لمن أديهو مجان)
ياسر(انا قلته ليك حقك محفوظ ياسعد)
سعد يضحك
وياسر يبتسم بخبث(كلها مجرد أيام وح إبدأ اللعب هههه)
.
_
جنب إحدى مدارس البنات
خالد(يعني خمستوهم)
عمر(طبعا ده كلامك)
مصعب(عاملين فيها أولاد جامعه وأكبر مننا ههه)
خالد(ههه طبعا الدفع حق الشله عمر)
مصعب(ههه مافي غيرو)
عمر(احم احم)
خالد(هههه)
مصعب(عمر صحبك الزهجة فكت منو)
خالد(تقصدني أنا)
عمر(في غيرك أمبارح أكان زهجان)
مصعب(مالك أمبارح ياخالد)
خالد(شوية فتر بس)
عمر(أسي إنت مانصيح عاين لي وشك ده عامل كيف)
.
_
داخل شركة حاج أحمد للملابس،وطبعا دي تبع أسرت عمر،وعلي هو المدير تبعها
علي(خلاص أسي إنت أمشي)
موظف(حاضر)
شال الورق وخرج من المكتب
علي يطلق آهات وهو يسند ظهره على الكرسي
(تفضل)قالها علي بعد أن سمع طرقات الباب
يدخل منذر
علي(إتفضل يامنذر)
منذر يتقدم ويجلس(الظاهر إنك تعبان)
علي يبتسم
منذر(نلغي المشوار)
علي(لا طبعا)
منذر(هههه مالك قايله بإنفعال كده،حالتو لسه ماعرفته حاجة عنها ولا قابلتها)
علي(خلاص بطل غلاسة)
منذر(طيب أها جاهز)
علي(نعم)
منذر(خلاص قوم عشان سلوى تحت في العربية)
علي(وليش ماطلعت معاك)
منذر(نحن مستعجلين يامدير قوم ساي)
.
تحت جنب باب الشركة
سلوى خطيبة منذر داخل العربية
منذر(حتركب معانة خليها عربتك)
علي(ماشي أرح أطلع بينه وربنا يستر)
منذر(ههه ماتخاف بقيت أسوق براحه بسبب الآنسه سلوى)
وضحكو
علي ركب جنب منذر وأما سلوى راكبه خلفهم
_
يتبع...

هذه قصتي-الحلقة{12}
.
.
عمر رجع البيت وكانت الساعة 4:00م
دخل وسلم علي أمو وطوالي على غرفتو..
[جاري الإتصال..آية]
عمر-الو
آية-أيو ياعمر معاك
عمر-وين الليله مامشيتي المدرسة
آية-عيانة ماقدرته أمش
عمر-سلامت القمر
آية-عندي صداع والله
عمر-صداع هههه وده بقولو عليهو عيه
آية-ماتصدق براحتك مع السلامة
عمر-دقيقه إنتي زعلتي وله شنو أنا بهزر
آية-بتهزر!!
عمر-انا آسف ياجميل
آية-بس تاني ماتكرره
عمر-ماقلنة آسفين
آية-طيب
عمر-أسي عاملة كيف
آية-كويسة
.
__
توقفت عربية منذر أمام إحدى المطاعم الفاخرة
جلس الثلاثة أمام إحدى طاولات المطعم ويبدو أن المكان هادئ فلا يوجد غير ثلاثة طاولات مشغوله..
علي(أها ماتقولو حاجة)
منذر ينظر لسلوى يريد منها أن تكلمه هي..
سلوى(بإختصار الأخلاق عالية والأدب مافي كلام والجمال متوسط وأبوها خيرت الرجال كرم وأخلاق،وانا بعرفو وأمها طيبه ومافيها كلام)
منذر(صاح ياعلي أنا كذا مرة مشيت بيتهم مع سلوى)
علي(إسمها منو)
سلوى(سحر محمد)
علي(سحر محمد،،طيب هي بتبقه ليك شنو)
سلوى(صحبتي)
علي(أها ساكنه وين وباقي أهله كيف)
منذر(بعد شارعين بس من بيت ناس سلوى)
سلوى(وعندها أخو واحد مغترب وأما الأعمام عندها عمة واحده وثلاثة أعمام و..و..)
‏.
علي(وهي عارفة حاجة اسي،يعني كلمتوها)
منذر(طبعا لا)
سلوى(مابنقدر نكلمه قبل ما إنت توافق)
علي(خلاص بكره ح أديكم الأكيده)
منذر(ماتضيعها ياعلي دي عروسة لقطه)
سلوى تنظر لي منذر بحدة(ماكنت تخطبها)
منذر بتوتر(قصدي أخليهو إوافق بي سرعة ماتفهمي غلط،أنا كفاي العسل ده)
علي(ههههههههه منذر وقع هههه)
وطوالي منذر إقرصو في رجلو عشان إسكت..
.
__
ياسر يدخل منزلهم..
ياسر(السلام عليكم)
خديجة أم ياسر(وعليكم السلام)
ياسر(وينه البت دي)
خديجة(قاعدة جوه في المطبخ بتخت في الغدة)
ياسر(يااا{آية} أسرعي أنا جعان)
آية تمرق وشايله الصينية(إنت بتين جيت)
ياسر إصلح التربيزه وإقعد..
خديجه صنقرت علي حيله..
آية تضع الصينية وتقعد..
.
__
في منزل ناس خالد..
خالد أكان راقد في السرير وبحاول إنوم عشان مايتعاطه مخدر أسي،لأنو حسه إن القروش البشيله من أبوه ما ح تغطي معاه بذات إنو ببلع مرتين في اليوم وأحيانا بستنشق ثلاثة مرات..
أكان بتقلب في السرير وما قادر إنوم وماسك رأسه الذين يألمه بشده..
خالد يقوم علي حيلو(الكلام ده مابجي أنا لازم أتصرف،لكن عندي حق جرعه وحده)
.
__
يتبع...

هذه قصتي-الحلقة{13}
_
صباح اليوم التالي..
طبعا اليوم ده الجمعة..
علي قاعد في الصالة مع حاجة زينب..
زينب(عمر نايم لسه)
علي(آي)
.
ثم تدخل فاطمة وهي شايله صينية الشاي..
زينب(كتر خيرك يافاطمة)
علي(أقعدي أشربي الشاي معانه ياخاله فاطمة)
فاطمة(لا أشربو ،أنا بشرب جوه ،عندي نظافة كتيرة الليله)
.
.
داخل غرفة عمر..
أكان نايم وفجأة تلفونو يرن..
عمر يفتح عينو وهو بعاين للمتصل ثم يرد..
عمر-أيو
آية-صباح الخير ياروحي
عمر-صباح النور
آية-ح نمرق الليله وين
عمر-أي فجه وخلاص
آية-مالك ياعمر صوتك كده
عمر-صحيت أسي بس
آية-اممم
عمر-في شنو مالك
آية-هههه كنت بتخيل شكلك وإنت قايم من النوم
عمر-أها تخيلتيني كيف
آية-ههههه مافي داعي عشان ما تزعل
عمر-بايخه
آية-إنت قاصدني أنا ياعمر
عمر-أمال مع نفسي
آية-أنا زعلانة
عمر-تهزري معاي ماأزعل وقت ما أفتح خشمي تقعدي تتزعلي،طيب ياستي حقك علي
آية-لا أنا دايره شكلاته
عمر-أهو ده الناقصني شكلاته من الصباح
آية-ما أسي بعدين لمن نطلع سوى
عمر-هههه طالما بعدين مافي مشكلة دي إنت تستاهلي أكتر من شكلاته
آية-بالجد ياعمر
عمر-طبعا ياروح عمر
.
___
ياسر نايم في حوش بيتهم..
خديجة(ياسر قوم الشمس جاتك)
ياسر يقوم يجرجر في كرعينو ودخل الغرفة إكمل نومو..
لكن تلفونو يرن..
ياسر يفتح الخط..
سعد-صباحك سعيد
ياسر-صباح الفل عليك
سعد-زولك وقع
ياسر-إنت جادي يازول ههههه
سعد-هههه جد الجد كمان ده جاني من الصباح
ياسر-أقيف ماتعمل أي حاجة لقاية ما أجيك
سعد-مافي داعي لأني أديتو موعد، نتقابل في الكافتريا بتاعت أمس
ياسر-بالنهار وله متين
سعد-آي الساعة 2:00م كده
ياسر-هههههه كده نحن ماشين كويس
سعد-ههههه تمام يله مع السلامة لقاية بعدين
.
.
وبره في البرنده كانت ام ياسر وأختو آية قاعدين..
خديجة(يعني لازم تطلعي مع صحباتك كل جمعة)
آية(آي ياماما ده أنا زهجانه الاسبوع كلو من البيت للمدرسة)
خديجة(طيب كلمي أخوك)
آية(ياسر قال لي أمشي لكن ماتتأخري أها وافقي ياماما دي كلها ساعتين بس)
خديجة(طيب إنتي حا تطلعي مع صحباتك ديل بتين)
آية(حا أطلع الساعة 2:00 وحا أجي 4:00)
خديجة(خلاص يابتي أمشي ربنا يحفظك)
آية تحضن أمها(ربنا ما إحرمني منك)
.
___
وفي نفس صباحية الجمعه..
خالد راجع من بيت سعد..
"معليش ياعمر والله ماقدرته أستحمل"
كان بمشي ووشو مخطوف وعيونو مغورقات..
.
.
___
يتبع...

هذه قصتي-الحلقة{14}
_
أها الحصل حصل وخالد قاعد مع ياسر وسعد ومعاهم ابراهيم في الكافتريا وكانت الساعه اتنين ونص كدا.
فهمت ح تعمل شنو بالضبط ياخالد،دا ياسر بالتكلم مع خالد السرحان بعييد
سعد بكرر ليهو الكلام
خالد ينتبه ليهم، اي فهمت خلاص اسي اديني زي ماوعدتني..
سعد بعاين لي ياسر
ياسر: ادي وخلصنة
خالد يشيل الحبه من سعد وإدسها في جيبو
خالد يتنفس بعمق: انا ح ادس لي عمر المخدرات في الموية او اي شيئ يشربه على اساس انو تاني يتعود عليها وكدا مهمتي ح تخلص مش دا طلبكم
ياسر مع ابتسامته الخبيثه: اي دا بس الدايرنو منك
خالد يحاول يكون طبيعي معاهم لكن من جواهو مضايق ضيق من البعمل فيهو دا لانو بالجد دي تعتبر خيانه وخيانة منو أعز أصحابو..
المهم استلم منهم الحبوب الح يدوبها لعمر عشان يشربها وشال هو حقو كأجر للبعملو ومشى منهم طواالي
اما الجماعه ديل بقو قاعدين في الكافتريا كدا لحدي الساعه 2:40م كدا وفجأه إبراهيم لمح ليك إتنين من شباك الكافتريا عاوزين يقطعو الزلط إتوقعوهم منو؟
.
وهناك الإتنين قطعو الزلط وشكلهم ح ادخلو الكافتريا
عمر: ههههه انا ماعارف ح أعمل شنو لمن اجي اطلب ايدك من ناس بيتكم ياسر ح إسوي لي شنو
آية: ياسر ما عندو دخل إنت خلي ابوي اجي من السفر اليوم داك وتعال بس
وفجأه عمر يقيف
آية: مالك في ش...سكتت لأنها شافت أخوها
آية: سجمي الليله ح اقتلني
عمر بتوتر: اسي يكون شافنا؟ يلا يلا بسرعه
وجري رجعو عاوزين يقطعو الزلط
.
إبراهيم: يااااسر اقيف إستهدأ بالله العربات تعال
سعد جره وراهم وهم التلاته مرقو عاوزين يلحقو عمر وآية
وفجأه..
برادو تجي طايره من بعيد وعمر جاري وآية وراهو عاوزين يقطعو بدون وعي
عمر بفزع وصوت عالي بعد ماقطع الزلط ومالقه آية وراهو: لااا أقيف اقيف
آية كانت وقعت أثر الجري وسط الزلط والبرادو جه ماشي فيها و و (آسف آية مافضل فيها حته سليمه)
ياسر في الجانب التاني للزلط تجمد وهو بعاين للفلم الحصل في أقل من دقيقتين، ماتت..أختي إنتهت..وبدأ يهزي بعبارات غريبه وقعد في الواطه وبقه يبكي..
إبراهيم برضو ماقادر يصدق الحصل دا
سعد بعد ما استوعب الحكاية وقدر يمرق نفسه من التفكير،كورك في إبراهيم وبدأ يجري ناحية الزلط يشوف ح إعمل شنو..
إبراهيم بكوراك سعد إنتبه ومسك ياسر وبدأ يهدأ فيهو لكن فجأه ياسر إغمي عليه
وأما عمر الواقف في الجانب المعاكس،بدأ يضحك براهو ومشى بدون وعي..
__
يتبع...

هذه قصتي-الحلقة{15}
_
الساعه 3:00م
طبعا في الوقت دا علي رجع من صلاة الجمعه قبل ساعه المهم هو اسي قاعد في البيت مع الحاجه يشربو في الجبنه
حاجه زينب قالت:إنت الصباح قلت لي مشوار وبعد ما ارجع بحدثك بيهو اها خير قلقتني ياولدي
علي قام إستعدل في قعدتو كدا وخت فنجان الجبنه وعاين لأمو وبدأ يتكلم والفرحه ظاهره في وشو اها قال ليها:
طبعا بتعرفي منذر وخطيبتو سلوى ياأمي
قالتلو:أي بالحيل
قال:هم إقترحو لي وحده وانا الصباح مشيت سئلته عنها وإتأكدت وكمان شفتها بالصدفه وهي طالعه من بيتهم
يازوول قال ليك حاجه زينب دي فرحة فرحة وقربت تزقرت لكن علي قال ليها:لسه بدري ياحاجه
قالتلو:إنت دايرها مش كدي
قال:اي لكن لسه ما اخدنا رايه هي
قالتلو:ربنا يعدل عليك ياولدي وإديك الفي مراضك
_
اها نمشي من اجواء الفرحه دي للمستشفى
لا لا خلاص اصلا سعد ماقصر هو وبعض شباب الحله اصحاب إبراهيم وياسر مستنين الجثمان يطلع من المشرحه عشان يودوهو الحله يدفنو
ونحن نمشي بيت ياسر
ياسر بعد ما فاق لسه راقد في السرير وجنبو إبراهيم
والبيت أكان مليان حريم بكوركن ويبكن دا كوم وأم آية حاجه خديجه كوم تاني دي أكانت بتبكي بكه والدمعات زي المطر لكن الحمدلله ماقاعده تنيح وتصرخ زي النسوان ديل
.
ندخل الغرفه لياسر
إبراهيم:ياسر إنت كويس إتكلم معايا
ياسر أكان ساكت وسرحان وبعاين في السقف بس
إبراهيم:ياسر
ياسر عاين ليهو:ناس سعد جو
إبراهيم:ضربت ليهو قبل شوية وقال اسي هم دخلو الحله
ياسر قام من السرير:يله خلينى الندفن
إبراهيم:ح تقدر؟
ياسر:ماتخاف أنا كويس
وقامو طلعو
_
يلا نخلي بيت البكه ونمشي نكوس عمر نشوفو طار وين دا كمان
تعالو عاينو هناك في واحد ماشي في الشارع
دا عمر دخل الحله
[بالمناسبه حلة ناس عمر قريبه من ناس ياسر]
عمر بعد ما أخد ليهو لفه كدا وحسه إنو فاق من الصدمه قرر يرجع البيت
لكن لسه هو متأثر شديد بالحصل
وقبل ما اضرب جرس الباب تلفونو بقه يضرب
نخلي ونمشي للضرب ليهو قبل ما إضرب ليهو
دا خالد قاعد في بيتهم وبفكر..أورط عمر في المخدرات وله لا،لكن هو عندو قروش وح إقدر يوفر حق الجرعه وفجأه يقول لا لا هو صحبي كيف اعمل كدا انا ح ارجع لسعد حبوبو دي لكن كدا انا ما ح القه حق الحبوب وح اموت
وفجأه شال التلفون..آسف ياعمر ماقدرته والله
وبدأ يضرب لعمر
-عمر كيف حالك
-ماكويس
-طيب وين إنت اسي
-جنب بيتنا
-تعال لي انا في البيت
-تمام
_
يتبع...